fjárlög 2027 Frú forseti. Ég þakka hæstv. ráðherra fyrir hennar ræðu. Ég held að við höfum flestöll skilning á því að það er áskorun að reka heilbrigðiskerfið á Íslandi. Það eru víða áskoranir í hinum ýmsu málaflokkum. Mig langar svolítið samt sem áður að ræða hagræðinguna sem er í rauninni staðreynd þegar kemur að stöðugildum eins og hæstv. ráðherra fór yfir. Það er verið að boða 1% fækkun stöðugilda hjá ríkinu og sértæk aðhaldskrafa er á spítalastiginu. Þar af eru tæplega 528 milljarðar kr. vegna fækkunar stöðugilda og tæpar 534 millj. kr. vegna innkaupaaðhalds. Þótt það komi fram að það eigi að hlífa framlínustörfum, sem mér finnst mjög mikilvægt og ég tek undir og styð, er mönnunarvandi sérstaklega alvarlegur eins og við sjáum á Sjúkrahúsinu á Akureyri sem á að gegna hlutverki varasjúkrahúss landsins. Mig langar af þessu tilefni að spyrja hæstv. ráðherra: Hvernig á að framkvæma 1% fækkun stöðugilda og milljarða aðhaldskröfu á spítalana án þess að það komi niður á framlínustörfum og mönnunaröryggi, sérstaklega á landsbyggðinni eins og á Sjúkrahúsinu á Akureyri? Hversu mörg stöðugildi verða lögð niður og hvaða störf eru það þá sem verða lögð niður?