fjárlög 2027 Virðulegur forseti. Þetta eru fróðleg andsvör sem hér eru veitt og svör hæstv. ráðherra við ýmsum málum. Ég heyrði að hæstv. ráðherra nefndi hér DRG, flokkunargjaldskrárkerfið sem hefur verið reynt að innleiða í einhverja áratugi inn í íslenska heilbrigðisþjónustu. Mig langar að forvitnast um það hvernig gangi að innleiða það á t.d. Landspítalanum, þ.e. hvernig gangi að sjá heildarmyndina á kostnaði við öll læknisverk sem fara fram inni á Landspítala. Síðast þegar ég vissi var ekki búið að innleiða þetta DRG-kerfi nema að litlum hluta á Landspítalanum. Það eru stórir þættir sem eru þarna fyrir utan en hafa verið leystir með einhverjum sérstökum samningum, ef ég skildi það rétt, um einstök læknisverk, inni á spítalanum samt sem áður. Ég velti því fyrir mér hvort hæstv. ráðherra gæti aðeins farið yfir þetta kerfi. Teldi hún til bóta að innleiða það að fullu? Ef ekki, í hvaða stöðu eru stjórnvöld á hverjum tíma til að átta sig á kostnaði við læknisverk? Ég tala nú ekki um ef í sæti heilbrigðisráðherra situr ekki læknismenntaður einstaklingur, sem er nú oftast. Er ekki nauðsynlegt að svona kerfi sé við lýði þannig að stjórnvöld og löggjafinn, fjárveitingavaldið, eigi hægt um vik að átta sig á kostnaði?