fjárlög 2027 Frú forseti. Það er nú ansi margt sem mann langar til að spyrja hæstv. ráðherra út í núna í tengslum við fjárlögin en við verðum örugglega að eiga það inni fyrir 2. umræðu. En ég staldraði aðeins við svör hæstv. ráðherra áðan þegar ég spurði hana út í fækkun stöðugilda, þessa 1% fækkun stöðugilda sem hún er að leggja til hérna á heilbrigðisstofnunum og að það eigi að hlífa framlínustarfsmönnum. Þar sagði hæstv. ráðherra, með leyfi forseta: „Ég sé fyrir mér … “, og nefndi hugsanlega millistjórnendur eða starfslok og það ættu einhverjir forstöðumenn að sjá um að segja upp þessu starfsfólki. Núna er það hæstv. ráðherra sem er að leggja línurnar og er að leggja þetta til, að það eigi að hagræða í þessum heilbrigðisstofnunum. Mig langar að spyrja hæstv. ráðherra — hún hlýtur að hafa sýn á þetta þar sem hún er að leggja þetta til: Hvaða störf leggur hæstv. ráðherra til að verði lögð niður? Og hvað eru þetta mörg stöðugildi sem þarf að segja upp til þess að við náum þessari 1% hagræðingu?