fjárlög 2027 Virðulegur forseti. Ég þakka hv. þm. Ólafi Adolfssyni fyrir seinna andsvar. Það var kannski engin spurning í hans andsvari en hann lýsti ákveðinni skoðun. Eins og ég kom inn á í fyrra svari hefur allt þetta kjörtímabil einfaldlega snúist um að ná hallalausum fjárlögum. Við höfum verið í gríðarlegum hagræðingaraðgerðum. Við byrjuðum á því að fækka ráðuneytum. Við höfum sett þak á hækkun launa kjörinna fulltrúa og æðstu embættismanna. Við erum að vinna í því að sameina stofnanir og fækka þeim um 15%. Við erum búin að sameina sýslumannsembættin. Við erum að velta við öllum steinum og sjá hvar hægt er að hagræða í rekstri, enda á að hagræða um 44 milljarða í þessum fjárlögum. Ég gef því lítið fyrir það að hér sé einfaldlega bara verið að skattleggja sig út úr þessum vanda. Það er verið að fara blandaða leið. Hvar er hægt að hagræða og hvar er hægt að sækja auknar tekjur með það að markmiði að reka ríkissjóð ekki lengur á yfirdrætti? Þannig hættum við að ýta undir vexti og verðbólgu hér á landi og þannig sýnum við ábyrgð og festu í rekstri. Ég er tilbúinn að skoða allar hugmyndir sem lúta að því hvernig við getum náð þessu hallaleysi fyrir næsta ár en það verður að vera jafnvægi í þeim tillögum. Það er ekki bara hægt að andmæla ákveðnum gjöldum ef þú skerð ekki niður í einhverri þjónustu á móti. Inntak ræðu þingmannsins var kannski að hér væri verið að ofþjónusta fólk, að það væri verið að veita of mikla þjónustu á Íslandi. En það er ekki það sem ég heyri þegar ég ferðast um landið. Ég heyri af uppsafnaðri innviðaskuld. Ég heyri af uppsafnaðri innviðaskuld í vegakerfinu, í heilbrigðiskerfinu, í menntakerfinu og ég heyri ákall frá íbúum landsins um að við einmitt bætum þjónustu við fólk sem greiðir hér skatta og gjöld. Ég lít á þetta sem blandað verkefni: Hvernig ætlum við að svara kalli landsmanna um að veita þeim þá þjónustu sem þeir kalla eftir og eiga skilið án þess að reka ríkið á yfirdrætti eins og hefur verið gert á síðastliðnum árum? Það tel ég vera skynsemi, ábyrg stjórnvöld og fyrir það stend ég og er stoltur af því.