fjárlög 2027 Virðulegi forseti. Ég var í þeirri ríkisstjórn sem tók við Covid, Reykjaneseldum, falli WOW air og Úkraínustríðinu. Ekki bera þetta saman við þetta grín sem er í gangi núna. Ekki bera þetta saman. Þetta eru væntanlega erfiðustu aðstæður sem íslenska ríkisstjórnin hefur tekið við, ein erfiðustu. Hér koma hv. stjórnarþingmenn aftur og aftur, telja upp hallann. Þeir vildu leggja meira í hann. Svo bara jú, reyndar jú, það var Covid, jú, jú. Það er enginn bragur á þessu. Það er enginn bragur á þessu. Þið tókuð við góðu búi. Þið höfðuð öll tækifærin til að ná hallalausum fjárlögum miklu hraðar. Það er alveg ljóst að þessi fjárlög, ef þau eru samþykkt svona, verða ekki hallalaus. Hef ég fengið svar við spurningunni um fjármálaráðið? Nei, virðulegi forseti, það hefur ekki komið svar við þeirri spurningu. Það er í fyrsta skipti að koma núna fram að það hafi orðið einhver samskipti milli fjármálaráðuneytisins og fjármálaráðs. Þeim samskiptum er haldið leyndum fyrir þingi og þjóð. En það liggur fyrir að það hefur í engu verið farið eftir þeim athugasemdum sem voru í álitsgerð fjármálaráðs og fjármálaáætlun var ekki einu sinni uppreiknuð. Það er alveg útilokað að þessi fjárlög, að öllu óbreyttu, verði hallalaus. Það sér það hver maður. Tekjuskatturinn, þið eruð búin að hækka tekjuskattinn tvisvar, bæði í síðustu fjárlögum og núna líka. Þið eruð búin að hækka tekjuskattinn og flesta þá skatta sem mönnum dettur í hug. Reyndar, af því að hv. þingmaður er læknir, þá hafið þið meira að segja verið að breyta gjöldum í heilsugæslunni eða í heilbrigðisþjónustu með þeim hætti að þið eruð að taka út það fyrirkomulag sem var sett til þess að það yrði þak á útgjöldum fyrir þá sem þurfa á þeirri þjónustu að halda. Sleggjan átti að virka strax og yfirlýsingin gekk út á það að það væri ekki þessi litla sleggja sem Bjarni var með, eins og það var orðað, það átti að lemja niður strax vexti og verðbólgu. En það hefur því miður ekki gerst. Kannski er það vegna þess að menn hafa ekki farið eftir ráðleggingum færustu fagmanna og þá er ég að vísa til fjármálaráðs.