fjárlög 2027 Virðulegur forseti. Ég vil byrja á að þakka fyrir athyglina sem mér var sýnd á elleftu stundu en vildi fyrst og fremst þakka fyrir málefnalega nálgun og taka undir orð hv. þingmanns um að við eigum mikilvægt verk fyrir höndum. Okkur er þröngur stakkur sniðinn núna og auðvitað eru mörg vandasöm verkefni sem felast í því og ýmsar ágætar spurningar sem vakna við þessa yfirferð hérna í þingsalnum sem við fylgjum eftir inni í nefndinni. Varðandi þau orð hv. þingmanns að það væri auðvelt að útfæra gjaldtöku á vegum, og vísar hann þar væntanlega bæði til kílómetragjalda eða veggjalda tengdra við stórframkvæmdir, nú eða umferðar- og flýtigjalda sem hafa verið nefnd hér á höfuðborgarsvæðinu, þá held ég að svo sé ekki. Ég held að það sé flókið. Það skiptir mjög miklu máli að þetta sé gert á sanngjarnan hátt og styðji við önnur markmið sem við setjum okkur í umferðar- og samgöngumálum, auðvitað að fá og flýta stórum framkvæmdum en líka þannig að byrðunum, ef við orðum það bara þannig, sé sanngjarnt skipt. Ég bregst aðallega við orðum þingmannsins því að stundum má í þessum sal heyra eins og þetta séu einhverjar nýjar hugmyndir sem ný ríkisstjórn hafi komið með. En staðreyndin er sú að þetta hefur staðið til mjög lengi, bæði í tengslum við samgöngusáttmálann og líka í tengslum við samvinnuverkefni, sem voru sex skilgreind verkefni á landinu, og kílómetragjöld hafa verið á dagskrá í fjármálaáætlun árum saman, frá alla vega síðustu ríkisstjórn, ef ekki tveimur síðustu. Flækjustigið við að gera þetta, eða kjarkurinn öllu heldur sem þarf til, endurspeglast í því að þetta var ekki útfært þó að þetta stæði til og væri býsna nálægt í tíma.