fjárlög 2027 Virðulegur forseti. Ég vil þakka fyrir málefnalegt andsvar og gott samtal um þetta. Ég sé það að vera framarlega í þessu svipað og það að við vorum, kannski ásamt Dönum og Hollendingum, býsna framarlega í að koma upp söfnunarkerfi í lífeyrisréttindum. Ég held að þetta sé í raun vandamál sem alla vega OECD bendir á að sé við lýði víða, bæði austan hafs og vestan, að innviðir eru úr sér gengnir, það er gríðarleg innviðaskuld, bæði í Bandaríkjunum og alla vega sums staðar í Evrópu, og hefur verið hér. Metnaður samfélagsins og kröfur, bæði almennings — við getum kallað það kjósenda — og líka stjórnmálamanna, eru að vegirnir séu betri, brýrnar séu fleiri, ferðatíminn styttri og umferðaröryggið betra, og þetta kostar. Bílarnir hafa á sama tíma orðið sparneytnari og því fögnum við en þar með hefur gengið á þennan tekjustofn sem var notaður til þess að halda í horfinu en dugði samt ekki til, og æ minna, eins og hefur verið bent á við framlagningu fjármálaáætlunar árum saman og það var iðulega langur tími sem fyrrverandi formaður Sjálfstæðisflokksins tók í þetta á hverjum blaðamannafundi á hverju ári til að koma þessum skilningi út meðal þjóðarinnar. Ég held að það hafi bara verið heilbrigt og sannfærði marga um að þetta viðfangsefni færi ekkert frá okkur ef við ætluðum að auka viðhald og bæta í stofnframkvæmdir og innviðaframkvæmdir. Til þess er þessi gjaldheimta. Auðvitað þarf hún að standa lengi eins og framkvæmdirnar og þess vegna er ábyrgð okkar mikil að ná sæmilegri sátt um hvernig við útfærum þetta. Til þess erum við hérna.