fjárlög 2027 Frú forseti. Ég þakka hv. þingmanni fyrir spurninguna. Ég held að almannatryggingakerfið okkar sé á ágætis stað. Það voru gerðar mjög stórar og miklar kerfisbreytingar á almannatryggingakerfinu 2024 og þær breytingar hafa auðvitað ekki alveg komið að fullu í ljós. Við sjáum auðvitað mikla aukningu á endurhæfingarlífeyrisgreiðslum, sem eru hluti af því að reyna að koma fólki aftur og hraðar til virkni, og það er margt sem bendir til þess að þetta gangi alveg ágætlega. Okkur hefur farið mjög fjölgandi þannig að málaflokkurinn stækkar auðvitað í takt við það. Hv. þingmaður spurði um mína sýn á stöðu efnahagsmála og helstu áherslur. Þær hafa verið og eru alltaf mjög skýrar og tengjast í sjálfu sér húsnæðismálunum, húsnæðiskostnaði fólks, hvort sem það er húsaleiga eða húsnæðislánin. Þetta er að mínu mati eitt stærsta kjaramál samtímans, að fólk hafi öruggt þak yfir höfuðið og hafi sömuleiðis borð fyrir báru til að geta leyft sér eitthvað meira en að kaupa nauðsynjar eftir að húsaleiga eða lánin eru greidd. Sú vinna sem við höfum verið að vinna þar felur m.a. í sér endurskoðun á húsnæðislánakerfinu. Þar er starfshópur sem er að skila af sér síðari hluta vinnunnar í síðasta lagi í mars á næsta ári. Sömuleiðis er líka heildarendurskoðun á húsnæðisbótakerfunum okkar og síðan þurfum við auðvitað að fylgjast mjög vel með og hafa allt eftirlit eins og best verður á kosið til að koma í veg fyrir misnotkun á kerfinu eins og alls staðar er.