fjárlög 2027 Virðulegi forseti. Ég þakka hv. þingmanni fyrir spurninguna. Ef ég fer fyrst í stofnframlögin, sem vissulega lækka um 3 milljarða, þá er vandinn ekki í sjálfu sér fjármögnun kerfisins heldur fyrst og fremst viðvarandi lóðaskortur sem hefur valdið því að við höfum náð að byggja inn í almenna íbúðakerfið. Ríkisstjórnin mun bregðast við ef eftirspurnin eykst aftur, ef okkur gengur betur að fá byggingarland og lóðir fyrir félög sem starfa innan þessa kerfis sem sannarlega hefur reynst björg í bú fyrir þá sem eru tekjulágir, ungar fjölskyldur eða þá sem vilja koma inn á húsnæðismarkaðinn síðar. Varðandi hlutdeildarlánakerfið þá gerðum við gríðarlega mikilvægar breytingar og ég er alveg þakklátur stjórnarandstöðunni fyrir þann skilning sem hún sýndi málinu, það náðist í gegn núna í desember síðastliðnum. Það hefur ekki staðið á viðbrögðum þar sem ásóknin og afgreiðsla hlutdeildarlána inni í kerfinu hefur sjaldan verið meiri og það er til skoðunar hvernig við getum eflt það enn frekar. Varðandi hlutdeildarlán á eldri íbúðir þá er það mín skoðun — og þar sem ég kom að því að búa þetta kerfi til á sínum tíma í starfshópi þegar ég var í öðru starfi innan verkalýðshreyfingarinnar þá var það mjög skýrt, sérstaklega í þeirri fyrirmynd sem við vorum að horfa til, bæði í Skotlandi og Bretlandi, að það að opna fyrir hlutdeildarlán á eldri íbúðir myndi hafa neikvæð áhrif á markaðinn, þ.e. það yrði til hækkunar ef eftirspurninni myndi ekki fylgja framboð. Ég kem kannski inn á fleiri atriði í mínu seinna svari.