breyting á ýmsum lögum vegna fjárlaga 2027 Forseti. Ég þakka hv. þm. Guðlaugi Þór Þórðarsyni fyrir spurninguna. Það er alveg ljóst að þær tekjuaðgerðir sem ráðist er í í þessum bandormi, og svo sem bandormi síðasta árs líka, hafa áhrif á ýmsa og í öllum tilfellum held ég að þar sé undir venjulegt fólk sem aðrir. Það þarf auðvitað að horfast í augu við það að langvarandi hallarekstur ríkisins verður að stöðva og ég hef átt orðastað við hv. þingmann um það áður. Þegar Alþingi tekur ákvörðun um að taka hluta af útgjöldum sem það vill verja til samfélagsins að láni þá er auðvitað verið að taka ákvörðun um það að þjóðin muni greiða þann reikning einhvern tímann. Þess vegna er það þannig að þær ákvarðanir sem hafa safnast upp núna á alllöngum tíma, sem eru orðnar allnokkrar að umfangi eða um 860 milljarðar, munu falla á þessa sömu einstaklinga, hjá því verður ekki komist. Það eru engir aðrir tekjustofnar hjá hinu opinbera. Varðandi álitsgerð fjármálaráðs, sem hv. þingmanni verður tíðrætt um, vil ég nú að vísu alls ekki taka undir að það hafi ekki verið horft til hennar. Þvert á móti held ég að þau fjárlög sem nú er verið að leggja fram svari að verulegu leyti þeim athugasemdum sem þar komu fram um einmitt mikilvægi sjálfbærs reksturs ríkisins og lækkun skulda til lengri tíma. Ég get glatt hv. þingmann með því að ekki er nóg með að ég leggi mikla áherslu á að fara yfir og fara eftir álitum fjármálaráðs heldur hefur stofnanaleg umgjörð fjármálaráðs verið styrkt verulega og það hefur verið gert með samningi við Háskóla Íslands sem nú skipar í formann ráðsins sem er óháður aðili og yfir allan vafa hafinn.