breyting á ýmsum lögum vegna fjárlaga 2027 Virðulegur forseti. Ég þakka hæstv. fjármála- og efnahagsráðherra kærlega fyrir svarið. Það er ánægjulegt að heyra að bæði fjármála- og efnahagsráðherra og forsætisráðherra séu nú svona í orði hér í þingi í dag — ég var að spyrja hæstv. forsætisráðherra á svipuðum nótum í óundirbúnum fyrirspurnum fyrr í dag að svo virðist sem að það sé ekki loku fyrir það skotið að menn séu tilbúnir að draga þessar hækkanir að einhverju leyti til baka, sem ég held að sé jákvætt. Ef ég man rétt það sem stendur í frumvarpinu þá held ég að við séum að tala um, og það segir svo í greinargerðinni, að kílómetragjaldið og krónutöluhækkunin muni hafa áhrif á hækkun á vísitölunni sem nemur 0,28%. Þannig að þetta mun að sjálfsögðu fara út í verðlagið, það mun hafa áhrif. Ég er nú bara ánægður með að heyra að menn séu alla vega til viðtals um þetta og átti sig kannski á því að menn hafi verið svolítið fljótir á sér. Þá er gott að bakka og gera bót og betrun. Ég vona svo sannarlega að hæstv. fjármála- og efnahagsráðherra sé til í það og sé maður að meiru ef hann fer þá vegferð.