breyting á ýmsum lögum vegna fjárlaga 2027 Frú forseti. Ég þakka fyrirspurnina. Þetta er kannski akkúrat kjarni málsins. Þetta er mjög sérstakt. Ríkisstjórnin fer fram með þetta háa hlutfall, 5,2%, sem vekur auðvitað mikla athygli og auðvitað er horft til þess. Eins og ég fór yfir í ræðunni, og ætla ekki að fara að endurtaka mig, var þetta nákvæmlega það sem leiðsögn Seðlabankans frá því í ágúst gekk út á. Opinberar gjaldahækkanir hafa samkvæmt orðum Seðlabankans verið leiðandi þáttur í verðbólguþróun hér innan lands. Þess vegna kom fólki auðvitað dálítið á óvart að sjá hversu hátt hlutfall hækkunin er. Og eins og hv. þingmaður rakti ágætlega og kom fram í minni ræðu líka þá er ekki síður sérstakt að sjá að forsætisráðherra boðar hálfpartinn að þetta sé algerlega uppi á borðum í kjaraviðræðum þar sem kveður aðeins við nýjan tón. Hæstv. ráðherra hefur nú verið mjög treg til að opna á að það sé mikið í boði af hálfu ríkisvaldsins til að liðka fyrir kjarasamningum en það kveður við nýjan tón þar. Þetta verður þá einhvers konar spil á því borði og þetta er allt saman mjög sérstakt, eins og ég sagði, og kannski partur af einhverri svolítið skrýtinni skák. 5,2% hækkunin er vissulega rökstudd hér af mikilli ákefð og maður verður að segja að það er mjög sérstakt að standa í svona umræðu ef við ætlum síðan kannski að nokkrum vikum liðnum að vera með einhverja allt aðra tölu og allt aðra forsendu í fjárlögum fyrir næsta ár. Þetta er því mjög sérstakt og ég tek undir með hv. þingmanni að það er auðvitað búið að senda skilaboðin út. Þetta er búið að hafa þessi áhrif. Ég held að þetta hafi verið einn af stærstu þáttunum í því hvernig viðbrögðin við fjárlagafrumvarpinu voru. Ég held að það sé alveg klárt að þau voru ekki í samræmi við þær væntingar sem ríkisstjórnin hafði.