breyting á ýmsum lögum vegna fjárlaga 2027 Virðulegur forseti. Ég þakka hv. þingmanni fyrir svarið. Maður getur haldið áfram að velta fyrir sér ýmsum þáttum sem eru undir. Auðvitað er allur ríkisreksturinn í heild sinni í raun og veru undir og þessar gjaldskrárhækkanir sýna pólitíska forgangsröðun og pólitíska sýn, varpa ljósi á það í hvaða átt menn stefna. Ég vakti athygli á því í umfjöllun um fjárlög, í samræðu við hæstv. háskóla- og menningarmálaráðherra, að mér fyndist það ekki beint réttu skilaboðin að fara t.d. fram með fulla 5,2% hækkun gagnvart útvarpsgjaldinu þar sem menn eru ár frá ári látnir borga meira í það. Og svo koma ýmis viðbótarframlög frá ríkisvaldinu og auka milljarðaskuldbindingar sem ríkisvaldið tekur á sig fyrir Ríkisútvarpið á sama tíma og einkamiðlar ýmist deyja drottni sínum eða draga verulega saman seglin, jafnvel þannig að það hreinlega sér á menningunni eftir slíka atburði eins og orðið hafa á síðustu mánuðum. Það er eftirtektarvert að í því árferði sjái menn ekki að nú væri kannski eðlilegt að segja við Ríkisútvarpið, sem er með þessa tæplega 300 starfsmenn í vinnu: Nú erum við sem samfélag að draga saman seglin á ýmsum sviðum, herða sultarólina. En þetta nær ekki þangað. Það kemur greinilega ekki til greina. Það er greinilega, eins og ljóst er orðið á síðustu dögum, mikil viðkvæmni fyrir allri umræðu um Ríkisútvarpið í þessum sal og sérstaklega af hálfu ríkisstjórnarinnar. Það má helst ekki anda á fyrirbærið. Maður sér að það er alveg skýrt haldið áfram með að hrófla ekki við því. Hafandi starfað í fjölmiðlum og þekkjandi þennan markað þá veit ég að fjölmiðlar geta hagrætt. Þeir geta alveg hagrætt. Það hefur sýnt sig, sannarlega. En ekki Ríkisútvarpið. Finnst hv. þingmanni það ekki skjóta skökku við, ekki síst á þessum síðustu og verstu tímum?