breyting á ýmsum lögum vegna fjárlaga 2027 Frú forseti. Ég þakka hv. þingmanni svarið. Þar sem hv. þingmaður situr í þeirri nefnd sem fær þetta mál til umfjöllunar langar mig að hvetja nefndina til að skoða þennan lið sérstaklega. Hér í dag hefur verið vísað mikið í skýrslu frá viðskiptaráðuneytinu varðandi áhrifin af lækkun bankaskatts á sínum tíma og ég átta mig á að það er ein setning í fréttinni á vef Stjórnarráðsins sem gefur til kynna að bankaskatturinn hafi í raun ekki skilað sér nægilega vel til neytenda. En það eru til fleiri greiningar þannig að ég vil hvetja hv. þingmann til að beita sér fyrir því í nefndinni að það verði raunverulega skoðað hver möguleg áhrif hækkunar bankaskatts eru. Virðulegur forseti. Ef ég man rétt svaraði hæstv. fjármála- og efnahagsráðherra því til, þegar hann var spurður um þetta við kynningu fjárlagafrumvarpsins, að það mætti alltaf eiga von á því að hækkun á skatti myndi fara út í verðlag. Ég ætla því að spyrja hv. þingmann: Telur hún svo vera?