breyting á ýmsum lögum vegna fjárlaga 2027 Frú forseti. Ég vil þakka hv. þm. Jóni Pétri Zimsen kærlega fyrir að spyrja út í þetta því að ég náði ekki að koma inn á það í ræðu minni. En þetta er nú sennilega eitt af því versta því að þetta er skýrt dæmi um hvað er sagt og hvað er satt. Því er alltaf haldið fram að það sé verið að vernda þá sem minnst hafa. Það er klárlega ekki svo. Þarna er verið að draga í raun og veru úr persónuafslætti sem allir hafa jafnan, þannig að þetta kemur hlutfallslega verst niður á þeim sem minnst hafa milli handanna. Bara eins og með aðrar skattahækkanir, segi ég, hefði frekar átt að taka til í ríkisútgjöldunum en að fara af stað með allar þessar skattahækkanir. Í þessu samhengi var hæstv. fjármálaráðherra hér áðan að brigsla mér um að vera að halda því fram að ég fengi ekki gögn sem ég gæti alveg fengið. Það er bara ekki rétt. Ég fæ t.d. engin gögn um það hvernig tekjur eru að skila sér, og í því sambandi hugsa ég nefnilega um vörugjöldin. Ég vil fá að vita hvernig þau eru að skila sér. Þau eru líka að bitna á öllum. Áður en við förum að ákveða áframhaldandi gjöld þá væri gott að vita hvernig gjöldin sem við settum á í fyrra eru að skila sér. Forseti minnir hv. þingmenn á að ræðutími er ein mínúta.