breyting á ýmsum lögum vegna fjárlaga 2027 Frú forseti. Ég vil þakka hv. þm. Nönnu Margréti Gunnlaugsdóttur fyrir gott svar við andsvari mínu og langar, svona fyrir þá sem eru að fylgjast með, að útskýra aðeins þetta framleiðniviðmið. Þannig er að persónuafsláttur hækkar eins og verðlagsþróun er og hefur verið eitt aukaprósent sem almenningur hefur fengið í afslátt. Það er kallað framleiðniviðmið. En nú á að taka þetta prósent af sem þýðir að allir landsmenn verða fyrir tekjuskerðingu, hver einn og einasti. Ég heyri ríkisstjórnina ekki tala um þetta. Þetta skiptir máli, að menn séu meðvitaðir um að allir landsmenn verða fyrir tekjuskerðingu af þessu. Margt smátt gerir eitt stórt. En mig langar að spyrja hv. þingmann hérna í lokin hvort hv. þingmaður geti hjálpað mér með að skilgreina venjulegt fólk og vinnandi fólk, því að það átti ekki að hækka skatta á þetta fólk og hæstv. forsætisráðherra talaði um að það mætti ekki plata og sagði það ítrekað. Er forsætisráðherra plata þegar þessir skattar eru hækkaðir, að mínu mati á venjulegt og vinnandi fólk?