breyting á ýmsum lögum vegna fjárlaga 2027 Frú forseti. Ég þakka hv. þingmanni fyrir sína ræðu. Ég hef áhuga á að eiga við hana orðastað varðandi einmitt þessar krónutöluhækkanir. Nú var það þannig að 10. ágúst síðastliðinn birti forystufólk verkalýðshreyfinganna pistil undir heitinu „Sumar án aðgerða“ þar sem það var rakið að félög þeirra höfðu mánuðum saman kallað eftir aðgerðum og viðbrögðum frá bæði stjórnvöldum og fyrirtækjum án árangurs. Núna örfáum dögum eftir að fjármálaráðherra hefur mælt fyrir fjárlagafrumvarpi sínu er í það minnsta hæstv. forsætisráðherra farinn að draga úr þessum áformum og tala á þann veg að það komi vel til greina að draga úr þessum hækkunum. Mig langar að spyrja hv. þingmann út í þetta, hvernig þetta birtist hv. þingmanni, þ.e. fjárlagafrumvarpið. Forsendur þess hafa verið til meðferðar hjá ráðuneytinu í marga mánuði. Ekki er rætt við verkalýðsfélögin um nokkurn skapaðan hlut, svo er þetta kynnt og núna hyggst ríkisstjórnin einhvern veginn breyta þessum áformum, ef ég skil hæstv. forsætisráðherra rétt.