breyting á ýmsum lögum vegna fjárlaga 2027 Frú forseti. Ég þakka hv. þingmanni fyrir andsvarið og get tekið þar undir. Á endanum held ég að þetta snúist að verulegu leyti um traust á aðgerðum stjórnvalda. Eins og kom fram í máli hv. þingmanns eru verðbólguvæntingar mjög háar og hafa farið hækkandi í tíð þessarar ríkisstjórnar. Ástæðan er einfaldlega sú að markaðurinn treystir ekki ríkisstjórninni til að skila þeim árangri sem hún var kosin til að ná í krafti mjög digurbarkalegrar yfirlýsingar í aðdraganda síðustu kosninga. Mér finnst þessi aðferð — að eiga ekki í opnu samráði við verkalýðshreyfinguna yfir allt sumarið, einbeita sér að þessari Evrópusambandsvegferð allri sem sogaði súrefnið frá ríkisstjórninni, mæta svo hingað, mæla fyrir þessum hugmyndum og falla frá þeim eða í það minnsta gefa í skyn að þarna sé hægt að veita eitthvert svigrúm. Af hverju í ósköpunum var þetta ekki rætt við verkalýðshreyfinguna í vor og lagðar fram betur ígrundaðar tillögur?