breyting á ýmsum lögum vegna fjárlaga 2027 Frú forseti. Ég get tekið undir að þetta eru eiginlega sláandi tölur sem hv. þm. Sigríður Á. Andersen fór yfir hér fyrr í dag. Í því sambandi langar mig aðeins að spyrja út í bótakerfið í tengslum við það hvort ríkisstjórnin telji sig búna að gera allt sem hún getur til að spara, vera með aðhald og útrýma sóun. Hún ætti að gera það áður en hún fer að skattleggja fólk og fyrirtæki. Ég er mikil áhugamanneskja um að velferðarkerfið okkar virki vel. Það hefur verið samstaða meðal þjóðarinnar í áratugi um að við viljum reka hér gott velferðarkerfi en við gerum það ekki nema við höfum kannski ákveðið eftirlit með því. Í því sambandi vil ég benda á að árið 2013, í bótaflokki örorkulífeyrisþega, opnaði Tryggingastofnun 626 eftirlitsmál. Síðan þá hafa útgjöld til málaflokksins meira en tvöfaldast og orðið mörg þúsund manna aukning þeirra sem þiggja bætur. Engu að síður hefur meðaltalið síðustu þrjú ár verið í kringum 70 mál. Erum við kannski að gleyma að rýna kerfin, hvar við megum gera betur, draga úr óráðsíu og sóun, af því að það er orðið of auðvelt einhvern veginn að hækka skatta og réttlæta það með því að það sé til að bæta þjónustuna? Er ekki hv. þingmaður sammála því að þetta sýni ekkert endilega að þjónustan sé betri?