orð þingmanns í störfum þingsins Ágæti forseti. Mig langaði að vekja athygli forseta á því að hér í störfum þingsins áðan kom hv. þm. Karl Gauti Hjaltason fram með alvarlegar ásakanir og óskir um afsögn utanríkisráðherra. Eitt af því fyrsta sem mér var kennt hér í þingsal var að þegar við hér í ræðustól ætlum að taka fyrir ákveðna þingmenn er þeim gefinn séns á því að vera í þingsalnum til að svara fyrir þær sakir sem eru á þá bornar. Mér finnst það góður siður og ég hvet forseta til að beita sér fyrir því, þegar slíkt er í umræðu, að tryggja það að viðkomandi ráðherrar eða þingmenn séu í salnum til að geta svarað fyrir þær ásakanir sem eru á þá bornar.