breyting á ýmsum lögum vegna fjárlaga 2027 Frú forseti. Ég þakka hv. þingmanni kærlega fyrir ræðuna. Ég er eiginlega komin hingað upp af því að mig langaði til að spyrja hv. þingmann hvort hann gæti aðeins farið betur yfir þetta varðandi framleiðniviðmiðið af því mér þykir svo áhugavert að ríkisstjórnin skuli — í fyrsta lagi er eitt að hún sé að svíkja öll kosningaloforð um að ætla ekki að hækka skatta en að gera það með þessum hætti þar sem þeir sem minnst hafa milli handanna lenda mjög illa í því og þrátt fyrir að ríkisstjórnin segi að þau ætli að reyna að vernda þann hóp. Hv. þingmaður talaði um að skattar hefðu áhrif á hegðun fólks, sem er vissulega rétt, en ríkisstjórnin hefur barist hart gegn því, eða ákveðnir fulltrúar, að birta gögn um það hvernig skattar eru að innheimtast, til að mynda af vörugjöldum. Hv. þm. Bergþór Ólason spurði beint út í þennan lið og ég hef spurt út í fleiri liði og við fáum ekki þær upplýsingar en engu að síður eigum við að vera að ræða hér hversu háa skatta við eigum að bæta við á almenning. Þannig að mig langaði að spyrja hv. þingmann, af því að nú erum við að ræða um bandorminn: Væri ekki eðlilegt að við vissum aðeins hvernig fyrri bandormi líður og hvort aðgerðir okkar þar séu að skila sér?