breyting á ýmsum lögum vegna fjárlaga 2027 Frú forseti. Ég vil þakka hv. þm. Nönnu Margréti Gunnlaugsdóttur fyrir fínt andsvar um ETS-skattinn og þessa hækkun hans. Ég hef ekki kafað þannig ofan í málið að ég geti svarað fyrir þetta en þetta er svona einn af þeim sköttum sem hafa komið Evrópu svolítið á kaldan klaka. Það eru ekki önnur meginlönd eða aðrar þjóðir að leggja þetta á og þetta skerðir samkeppnishæfni álfunnar. Svo heyrir maður alls konar sögur í kringum þetta, að menn séu að umskipa einhvers staðar í Marokkó og Gíbraltar, skipin sem koma frá Sjanghaí, til að reikna ekki þessa skatta alla leiðina. Þetta er kerfi sem þyrfti einhvern veginn að hugsa alveg upp á nýtt og við sem eyþjóð sem neyðumst til að nota flugsamgöngur þyrftum virkilega að taka þessi mál til alvarlegrar skoðunar og vega og meta hagsmunina af því sem fer í þessa skatta og í það kannski að bæta kjör almennings með öðrum hætti.