breyting á ýmsum lögum vegna fjárlaga 2027 Frú forseti. Ég vil byrja á því að þakka hv. þingmanni fyrir ræðuna. Það kom nú ekki alveg skýrt fram hvort hv. þingmaður vilji ná saman fjárlagahallanum og sé þá sammála markmiði ríkisstjórnarinnar hvað það varðar, að skila hallalausum fjárlögum. Þá væri áhugavert að vita hvaða leiðir hann vill fara. Hann sagðist vilja vaxa út úr vandanum en það er auðvitað vandi ef menn ætla jafnvel að auka hallann vegna þess að ef menn afla ekki tekna þá bara stækkar gatið. Það væri því fróðlegt að fá upplýsingar um hvaða leiðir hv. þingmaður sér fyrir sér. Það hafa komið fram frá Sjálfstæðisflokknum tillögur t.d. um að selja Leifsstöð, selja Landsnet, sem er einokunarfyrirtæki sem dreifir orkunni um landið, selja Rarik og fleiri þættir. Það væri áhugavert að sjá hvaða leiðir hv. þingmaður sér. Er hann jafnvel tilbúinn að fara í það að efla innlenda fiskvinnslu þannig að við séum að auka verðmætasköpun innan lands? Það væri fróðlegt að fá að heyra uppbyggjandi umræðu og tillögur, bæði hvað varðar tekjuauka og sparnað, ef menn vilja fara aðrar leiðir heldur en þær tekjuöflunarleiðir sem ríkisstjórnin hefur boðað.