breyting á ýmsum lögum vegna fjárlaga 2027 Frú forseti. Ég vil þakka hv. þm. Sigurjóni Þórðarsyni fyrir ágætisandsvar. Fyrir það fyrsta er ég ekki til í að gera það sama og forsætisráðherra hefur nefnt, að loka fjárlagagatinu sama hvað það kostar. Ég væri ekki til í að slátra mjólkurkúnni af því að fólkið er svangt. Ég vildi frekar mjólka og hjálpa henni mögulega að eignast kálfa, fjölga kálfunum, geta fengið meiri mjólk í staðinn fyrir einskiptisaðgerð og slátra henni og hafa nóg kannski í viku. Það er grunnpunkturinn. Sama hvað það kostar. Þetta er ákveðin mantra og þetta er pólitískt hugtak þar sem menn ætla að reyna að ná að loka fjárlagagatinu. Ég er hlynntur því almennt að menn reki, hvort sem það er heimili, fyrirtæki eða ríkissjóður, hallalausan rekstur, algerlega hlynntur því, en ekki sama hvað það kostar. Ég er ekki tilbúinn að fórna öllu til þess, alls ekki. Með fiskvinnslu þá vil ég að við fullvinnum sem mest hérlendis, að virðiskeðjan sé sem mest á Íslandi, að við fáum sem mest fyrir hvert kílógramm af fiski og það hjálpar víða til við að halda byggð í landinu. En ekkert af þessu er sama hvað það kostar. Það er ofboðslega óábyrgt að segja það. Það er því miður einhver mantra sem hefur gengið þvert í gegnum alla ríkisstjórnina.