breyting á ýmsum lögum vegna fjárlaga 2027 Frú forseti. Ég vil sérstaklega þakka hv. þm. Jóni Pétri Zimsen fyrir að hann skuli taka svona vel í tillögur um að efla innlendan virðisauka. Ég held að það skipti miklu máli. Ég fór yfir það í störfum þingsins að við erum ekki að tala um einhverjar baunir heldur marga milljarða á hverju ári í gjaldeyri sem gæti hjálpað okkur að reka samfélagið og auðvelda okkur þessa vinnu. Það er mikils um vert að fá hér almennan samhljóm, bæði hvað þetta varðar og að við nýtum þær aflaheimildir sem eru gefnar út. Mér finnst það skipta máli og að menn séu ekki að láta aflaheimildir ár eftir ár dauðar falla þannig að enginn sé að veiða fiskinn. Það á t.d. við um ufsann ár eftir ár og það væri fróðlegt að fá að heyra afstöðu þingmanns hvað það varðar. En ég fagna því að menn séu hér tilbúnir að leita leiða. Það er einmitt það sem við eigum að gera, vera samtaka í því að reka ríkissjóð réttum megin við núllið.