breyting á ýmsum lögum vegna fjárlaga 2027 Frú forseti. Ég þakka hv. þm. Ólafi Adolfssyni fyrir prýðisgóða ræðu hér áðan. Hann kom nokkuð víða við eins og venja er í svona viðamiklu frumvarpi eins og hér liggur fyrir. Hann kom aðeins inn á krónutöluhækkanirnar, kílómetraskattinn, bankaskattinn og fleiri skatta sem á að hækka samkvæmt þessu frumvarpi. Ég er sammála þingmanninum, og ég ætla ekki að leggja fyrir hann gildru, bara þannig að það sé sagt, þegar hann sagði í andsvari við hv. þm. Örnu Láru Jónsdóttur að það sé ekki góð leið að hækka skatta. Ég er fullkomlega sammála því. Ég held að við séum líka sammála um það að hallalaus fjárlög eru að sjálfsögðu gott markmið, mjög gott markmið. Það er hins vegar ekki sama hvaða leið er farin að því að ná hallalausum fjárlögum. Þessi ríkisstjórn ætlar að hækka skatta hér mjög skarpt að mínu viti, skatta og gjöld á hinn venjulega borgara í landinu. Skattar verða hækkaðir á allt vinnandi fólk. Við skulum hafa það á tæru. Mig langar að spyrja þingmanninn hvort ekki væri eðlilegra að ríkið tæki fyrst til í eigin ranni, gengi miklu harðar fram í eigin rekstri, fækki verkefnum, minnki yfirbyggingu, sameini enn frekar stofnanir og forgangsraði fjármunum betur, standi eðlilega vörð um alla grunnþjónustu. Það er líka alltaf verið að tala um Covid. Ég hef t.d. grun um að ríkisstarfsmönnum hafi fjölgað mjög í kjölfar Covid. Væri þá ekki bara fínt að byrja á því að setja fjölda ríkisstarfsmanna á sama stað og hann var fyrir Covid?