breyting á ýmsum lögum vegna fjárlaga 2027 Frú forseti. Ég þakka aftur hv. þm. Ingibjörgu Davíðsdóttur fyrir gott andsvar. Nú heyrði ég ekki hvað varaseðlabankastjóri sagði en ég heyrði hvað hv. þingmaður sagði og ég ætla að taka undir með það að það er langvarandi ósiður að verðtryggja alla hluti. Ég held að það sé allt of víðtækt í okkar samfélagi að það sé verið að verðtryggja hluti. Það er kannski ástæðan fyrir því að of stórum hluta þjóðarinnar finnst hann vera eiginlega hlutlaus gagnvart þeim þætti. Ég er sjálfur að reka lyfjabúðir. Það er nú reyndar þannig hjá okkur að við erum að selja töluvert af öðru en lyfjum, sem ríkið ákveður reyndar alla álagningu á, en þar er auðvitað freistingin sú, eins og í öðru, að þegar birgjar hækka freistist maður til að setja hluta af þeirri hækkun eða jafnvel alla hækkunina á viðskiptavininn. Við búum reyndar við það í lyfjageiranum að þar er einhver samkeppni og á einhverjum stöðum töluverð samkeppni þannig að það ætti í rauninni að tryggja að menn leiti allra leiða til að velta ekki öllum kostnaðarauka út til viðskiptavinanna. En þú getur ekki gengið út frá því sem vísu að það sé hægt. Varðandi þessi 5,2% þá átta ég mig ekki alveg á því af hverju við erum komin í þá stöðu gagnvart forsætisráðherra eða að þetta sé talið sem einhvers konar útspil í kjarasamningum. Mér finnst það enn furðulegra þegar horft er til þess, ég gat ekki heyrt annað, að hún væri ekki í samtali við Vilhjálm Birgisson á Akranesi og Sólveigu Önnu Jónsdóttur. Það eru nú aðilarnir sem fara m.a. með það umboð þannig að ég skil ekki alveg hvernig hæstv. forsætisráðherra er að hugsa þetta.