barnavernd Virðulegur forseti. Ég þakka hæstv. ráðherra fyrir hennar yfirferð. Eins og kom fram í máli hennar fór þetta mál ekki í gegn hérna í vor og var það einkum og sér í lagi út af andstöðu eða mikilli gagnrýni á að fósturkaflinn svokallaði væri ekki tilbúinn. Alvarlegustu athugasemdirnar við þetta frumvarp komu einmitt á þann kafla. Meðal athugasemda var að það þyrfti að breyta eftirlitshlutverki þannig að ríkið kæmi þar sterkar inn; að það væru ekki að einhverju leyti sömu aðilar að veita þjónustuna og hafa eftirlit með henni. Ég tek t.d. eftir því að í umsögn Barnaverndar Reykjavíkur um þetta breytta frumvarp var einmitt lögð áhersla á það og lýst yfir vonbrigðum með að ekki skuli hafa verið lögð ríkari áhersla á þátttöku og ábyrgð ríkisins varðandi eftirlit með gæðum barnaverndarþjónustunnar þannig að þarna væru ljós skil á milli, eins og ég var að lýsa. Það væri áhugavert að fá fram hjá hæstv. ráðherra hvað hún telur að þurfi að gerast núna. Erum við að fara að taka fósturkaflann sérstaklega og aftur fyrir og gefa okkur tíma í það? Hvar telur hún málið statt varðandi þann hluta frumvarpsins?