barnavernd Virðulegur forseti. Ég þakka hæstv. ráðherra fyrir hennar andsvar. Þetta snýst um þátttöku og ábyrgð ríkisins í eftirlitinu. Við eigum eftir að fara betur yfir það í hv. velferðarnefnd hvernig til hefur tekist og hvernig komið hefur verið til móts við þær áhyggjur og umsagnir sem fyrir lágu. Af því að við erum líka með þennan málaflokk, börn með fjölþættan vanda og fjölþættar stuðningsþarfir, þá kom fram í sumar dálítið hávær gagnrýni á þann málaflokk og stöðu hans. Það voru önnur mál í forgrunni í sumar og það kom fram gagnrýni frá sveitarfélögunum um að það hefði komið fram reglugerð, rúmu ári eftir að samkomulag var gert milli ríkis og sveitarfélaga um að ríkið ætlaði að taka að sér þennan málaflokk, þar sem var ákveðið mjög einhliða að þrengja skilgreiningu á því hvaða börn falla undir þetta. Ég veit að í nýju fjárlagafrumvarpi er verið að bæta aðeins í upphæðina en það er augljóslega, samkvæmt því sem sveitarstjórnarfólk og Samband íslenskra sveitarfélaga hefur sent frá sér núna á miðju sumri, að koma þeim í opna skjöldu að reglugerðin sé að þrengja svona málið. Það eru mörg sveitarfélög í gríðarlegum vanda og miklar áskoranir sem við þeim blasa í rekstri vegna þess hve málaflokkurinn er gríðarlega þungur, eins og við þekkjum, og þeim finnst að ríkisstjórnin hafi dálítið gengið á bak orða sinna með því að þrengja einhliða þessa reglugerð sem birt var rúmu ári eftir samkomulagið sem allir voru svo ánægðir með.