barnavernd Frú forseti. Ég þakka hv. þingmanni fyrir ágætisræðu. Ég finn að hún brennur fyrir málaflokknum og börnunum okkar. En það er mikilvægt að hafa í huga að við vorum að taka við verkefnum frá sveitarfélögunum. Að eigin frumkvæði vorum við að taka við verkefnum frá sveitarfélögunum. Við vorum ekki að leggja neina klafa á sveitarfélögin. Við vorum ekki að bæta á sveitarfélögin. Reglugerðin mín frá því í sumar byggist á samkomulagi ríkis og sveitarfélaga frá 19. mars í fyrra. Samkvæmt samkomulaginu tekur ríkið ábyrgð á mjög fámennum og afmörkuðum hópi barna með fjölþættar stuðningsþarfir og í þessu samkomulagi stendur skýrum stöfum að um sé að ræða þriggja milljarða króna kostnað fyrir ríkið. Það er mikilvægt að hafa í huga að sveitarfélögin bera áfram almenna ábyrgð á málaflokknum og á málaflokki fatlaðs fólks, ásamt því að bera ábyrgð á málaflokki fatlaðra barna. Afmörkunin er því mikilvæg enda ber að horfa til þess að samkvæmt lögum er þjónusta við fatlað fólk með langvarandi stuðningsþarfir algerlega á ábyrgð sveitarfélaga. Það hefur ekkert breyst með þessu samkomulagi sem við undirrituðum í mars í fyrra. Kjarni ágreiningsins við sambandið lýtur að því að sambandið telur að hópur barna sem er með miklar þjónustuþarfir vegna fötlunar sem munu ekki breytast og þurfa sömu þjónustu á fullorðinsárum eigi að falla undir þetta samkomulag. Að mati okkar er slík túlkun mun víðtækari en sú afmörkun sem lá til grundvallar samkomulaginu. Annars höfum við óskað eftir áframhaldandi samtali við Samband íslenskra sveitarfélaga um frekari skilgreiningu á því hvaða börn teljast vera með fjölþættar stuðningsþarfir. Ég hef sagt frá því að við munum meta það fljótlega hvernig reglugerðin reynist okkur. Hvað erum við að gera fyrir börnin okkar? Við erum t.d. núna að ráðast í afar metnaðarfulla uppbyggingu á fjölþættu meðferðarheimili í Garðabæ og ég hlakka mjög til þegar það verður að veruleika. Það mun hjálpa okkur mikið að sinna börnunum okkar með fjölþættan vanda sem við þurfum að taka utan um utan heimilis.