stefna og framkvæmdaáætlun um samþættingu þjónustu í þágu farsældar barna til ársins 2030 Virðulegur forseti. Ég þakka hæstv. ráðherra fyrir hennar ræðu hérna sem var innblásin eins og við mátti búast. Farsældarlögin eru einstök og í þeim er meginstefið að grípa snemma inn í hjá barni sem á í vanda og sem hægt er að spá fyrir um kannski strax frá mjög ungum aldri að geti átt í vanda, annaðhvort námslega eða félagslega eða á annan hátt. Það er hugsunin og það er ánægjulegt að segja frá því að í því sveitarfélagi sem ég bý í og hef komið aðeins nálægt þá var einmitt byrjað með þessa hugsun inni í kerfi sem hét Brúin og gafst vel þar sem farið var markvisst í það að skima eftir slíku strax á leikskólaaldri. Má segja að farsældarlögin séu svolítið byggð á því að leggja áherslu á þessa snemmtæku íhlutun sem er svo mikilvæg til að koma í veg fyrir vanda og taka strax á málum þar sem grunur leikur á að geti orðið vandamál áður en það verður allt of stórt þannig að það sé jafnvel orðið illviðráðanlegt. Hæstv. ráðherra nefndi mælingar hérna í ræðu sinni. Nú er þetta búið að vera við lýði hér í fimm, sex ár. Það eru farsældarfulltrúar um allt land og öll sveitarfélög og svæði hafa verið að setja sig í stellingar til að reyna að vinna út frá þessum nýju lögum. Hafa verið gerðar einhverjar mælingar hingað til á því hvernig til hefur tekist, af því að nú er komið nokkurra ára tímabil sem vert væri að skoða?