stefna og framkvæmdaáætlun um samþættingu þjónustu í þágu farsældar barna til ársins 2030 Frú forseti. Það var kannski ekki bein spurning í andsvari hæstv. ráðherra. Hann nefndi hér annaðhvort Reykjanesbæ eða Suðurnesjabæ, að þar hefði mælst hjá landlækni bæting á líðan barna. Það er ágætt og bara frábært en við þurfum þessa hlutlægu mælikvarða. Þetta er okkur víti til varnaðar hvernig við förum af stað, að það sé ekki tekin einhver staða áður en við leggjum af stað. Við vitum hvar við erum stödd þá og svo skoðum við hvernig málinu fram vindur. Það er magnað að segja frá því að staðan víða um land fyrir farsældina var mjög misjöfn og staðan í skólum var misjöfn. Farsældin ætti þá að vera til samræmingar og til jafnræðis og vonandi verður hún það undir forystu hæstv. ráðherra. En það skiptir máli að við vörðum leiðina og mælum hvað gengur og hvað gengur ekki þannig að við forgangsröðum fé þangað sem best nýtist. Svo er það að byrja strax þegar barn er í móðurkviði að styrkja foreldrana, styrkja þá til að hafa góð og mikil tengsl við barnið sitt. Það er líklegast ein mest fyrirbyggjandi aðgerð sem hægt er að fara í hvað öll lífsgæði barna varðar.