stefna og framkvæmdaáætlun um samþættingu þjónustu í þágu farsældar barna til ársins 2030 Virðulegur forseti. Ég þakka hæstv. ráðherra fyrir að koma hér í andsvör við mig og þessar upplýsingar sem hún hefur hér gefið. Það er gott að vita til þess að hér séu þessir liðir fullfjármagnaðir og hún nefndi líka 350 milljónir sem eiga að fara í að vinna á biðlistunum og því fögnum við öllsömul. Ég vona og vænti þess að við sjáum árangur þess innan skamms því að eins og svo oft hefur verið bent á, og ég veit að hæstv. ráðherra hefur mikinn skilning á því, þá er auðvitað hálft ár hjá tveggja ára barni rosalega langur tími þó að það sé ekki langur tími hjá fullorðnu fólki. En þegar þessi ungu börn bíða eftir þjónustu eða greiningum þá er þetta auðvitað svo stór hluti af þeirra ævi. Hæstv. ráðherra talar hér um að þetta hafi gengið vel á mörgum stöðum og fjöldi barna og fjölskyldna sé að fá þjónustu í samræmi við þessa hugmyndafræði. Það er gott og það er vel. Mig langar bara að því sé til haga haldið, þetta er kannski meira líka bara hvatning til nefndarinnar sem mun vinna málið áfram, að skýrsla ríkisendurskoðanda verði skoðuð vel því að eitt af því sem kemur þar fram er að það séu færri börn, ef ég skil þetta rétt. Með leyfi forseta, þá stendur hérna: „Þótt beinn kostnaður vegna laganna sé ekki langt frá efri mörkum kostnaðarmatsins þiggja um fjórfalt færri börn samþætta þjónustu en gert var ráð fyrir.“ Jafnframt er farið yfir að það séu ákveðnar kenningar uppi um að það sé ofskráð, þá er reyndar sérstaklega verið að vísa til fósturbarna. Ég veit að hæstv. ráðherra mælti hér fyrir frumvarpi til barnaverndarlaga áðan. Ég náði því miður ekki að taka þátt í því samtali en þar stöndum við aftur uppi með gríðarlega mikilvægt verkefni. Ég vil hvetja hv. velferðarnefnd til að vinna hratt og vel að barnaverndarlögunum en ekki síður þarf að huga að fósturkafla laganna og því sem kemur fram í skýrslu Ríkisendurskoðunar og tengist auðvitað farsældinni beint, þ.e. hvaða umgjörð við búum fósturforeldrum, þeim fjölda fólks sem er að taka það mikilvæga verkefni að sér.