sveitarstjórnarlög Virðulegur forseti. Ég þakka hæstv. ráðherra fyrir framsöguna um þetta frumvarp sem er nú reyndar lagt hérna fram í annað sinn. Það fór fram ágæt umræða um það, ef mig rekur minni til, á síðasta þingi síðasta vetur. Ég vænti þess að umræðan verði mikil um þetta mál sem er umfangsmikið. Mig langaði í þessu andsvari að dvelja við eitt atriði sem ég ræddi reyndar við hæstv. ráðherra á sínum tíma þegar hann lagði málið fram. Það var hvernig honum hugnaðist að gera breytingu á þessu frumvarpi sem lýtur sérstaklega að Reykjavík, að veita borgarstjórn Reykjavíkur meira frelsi til að ákveða fjölda borgarfulltrúa. Nú er það þannig að kveðið er á um það í þessu frumvarpi, eins og í núgildandi lögum, að sveitarfélög með yfir 100.000 — í frumvarpinu er sem sagt ekki gerð breyting á því ákvæði sem kom nýtt inn í núgildandi sveitarstjórnarlög fyrir nokkrum árum sem kveður á um að sveitarfélög með yfir 100.000 íbúa þurfi að hafa sveitarstjórnarfulltrúa á bilinu 23 upp í að mig minnir 31. Þannig er það í dag að Reykjavík má lögum samkvæmt ekki hafa færri borgarfulltrúa en 23. Eftir sem áður er það ákvörðun borgarstjórnar hversu margir þeir eru á þessu bili. Ég hef sjálf lagt fram ítrekað frumvarp til breytingar á þessu ákvæði sveitarstjórnarlaga í þá veru að borgarstjórn hafi heimild til að kveða á um færri borgarfulltrúa en nú er. Hvernig hugnast hæstv. ráðherra sú breytingartillaga?