sveitarstjórnarlög Virðulegur forseti. Ég þakka hv. þingmanni fyrir spurninguna. Þetta atriði kom ekki til skoðunar við undirbúningsvinnu frumvarpsins. Frumvarpið er mjög umfangsmikið og nauðsynlegt til að koma á mikilvægum réttarbótum sem ég tel að þverpólitísk sátt geti ríkt um. Ég er hlutlaus gagnvart þessu atriði, um hvort eigi að skylda sveitarfélög yfir 100.000 manns til að hafa 22 eða fleiri, en mín persónulega skoðun er þessi: Vandinn sem blasir við er ekki fjöldi sveitarstjórnarfulltrúa. Vandinn sem blasir við er of mikill fjöldi sveitarfélaga sem geta ekki veitt nægilega þá þjónustu sem þeim ber samkvæmt lögum. Það er stóri vandinn og ég held að ef áhugamál hv. þingmanns er skilvirkni og hagkvæmni sveitarstjórnarstigsins þá væri ég mun hlynntari því að sveitarfélögum verði fækkað og þau sameinist svo að þau geti náð betur utan um verkefni sín. Það er stóri vandinn á sveitarstjórnarstiginu. Hvað þetta varðar þá tel ég að við eigum að taka höndum saman um það, og ég tel að þingmannanefndin fái þetta hlutverk, að stuðla að því að sveitarstjórnum fækki. Við getum ekki haft sveitarfélög sem eru með 50 íbúa, jafnvel 20 íbúa yfir vetur. Þetta atriði er stóra vandamálið.