sveitarstjórnarlög Virðulegur forseti. Ég þakka hæstv. ráðherra fyrir ræðuna og fyrir að koma með svona stórt og mikilvægt mál inn í tíma. Það er mikilvægt fyrir þingið að það hafi góðan tíma til að vinna málið. Ég ætla að taka undir með hv. þm. Sigríði Á. Andersen sem talaði hér á undan. Ég hef lengi haft þá skoðun að það ætti að breyta þessu til baka í sveitarstjórnarlögunum. Ég legg bara til að við sammælumst um breytingartillögu á þessu frumvarpi ef nefndinni dettur það ekki í hug sjálfri. En mig langar að spyrja hæstv. ráðherra út í 143. gr., um mat á fjárhagslegum áhrifum fyrir sveitarfélög, þ.e. þá skyldu að öllum stjórnarfrumvörpum, stjórnvaldsfyrirmælum og stefnumarkandi ákvörðunum af hálfu ríkisins þurfi að fylgja fjárhagslegt áhrifamat á sveitarfélögin. Mig langar að spyrja hæstv. ráðherra: Hvað er í þessari 143. gr. umfram það sem er í, ég held að þessi grein sé nr. 129 í núverandi sveitarstjórnarlögum, sem tryggir sveitarfélögunum að raunverulegt mat fari fram á öllum þeim kostnaði sem á þau er lagður með ákvörðunum héðan frá Alþingi?