sveitarstjórnarlög Virðulegur forseti. Í frumvarpinu er gert ráð fyrir að ráðherra beri að grípa til ráðstafana ef í ljós kemur að lagasetning, stjórnvaldsfyrirmæli eða stefnumarkandi ákvörðun stjórnvalda muni hafa fjárhagsleg áhrif á sveitarfélög og tryggja að mat fari fram. Í núgildandi lögum, 129. gr. sveitarstjórnarlaga, segir að ráðherra beri ábyrgð á því að fjárhagslegt mat fari fram en ekkert er kveðið á um í ákvæðinu um afleiðingar þess að matið fari ekki fram. Ýmsar leiðir gætu komið til greina til að árétta skyldu ráðherra hér, en sú leið sem varð fyrir valinu hjá starfshópnum var að ganga lengra en núgildandi ákvæði og leggja til að mælt yrði fyrir um að ráðherra beri að grípa til ráðstafana ef ekkert mat hefur farið fram, að grípa til ráðstafana en ekki að bera ábyrgð. Það er munurinn. Í því felst að ráðherra ber stjórnsýslulega ábyrgð að eiga frumkvæði að ráðstöfun til að leiðrétta þau mistök ef fjárhagslegt mat hefur ekki farið fram. Dæmi um það sem ráðherrann gæti gripið til myndi t.d. snúa að breytingu á fjármögnun eða breytingu á þjónustukröfum. Þar sem atvik mála geta verið afar mismunandi er lagt til að ákvæðið verði opið vegna eðlis slíkra ráðstafana, en ýmislegt annað getur komið til greina en breytingar á fjármögnun eða breyting á þjónustukröfum, t.d. að falla alfarið frá því að fela sveitarfélagi verkefni. Það er líka möguleiki, þriðji möguleikinn.