sveitarstjórnarlög Virðulegi forseti. Ég þakka hæstv. ráðherra fyrir svarið. Ég hef mikinn áhuga á þessari grein og ég held að það sé mjög mikilvægt að hún verði að lögum og að hún fái raunverulega framkvæmd. Þá langar mig að nefna það að hér rétt á undan var hæstv. mennta- og barnamálaráðherra að mæla fyrir þingsályktunartillögu um framkvæmdaáætlun um samþættingu þjónustu í þágu farsældar barna til ársins 2030. Þar hefur svona mat ekki farið fram. Eins og fram kom í andsvörum mínum við hæstv. ráðherra þá er þar verið að taka fjármagn í rauninni frá sveitarfélögum sem hafði verið áætlað í það verkefni á sínum tíma. Og hér eru alls konar aðgerðir og sveitarfélögin eru nefnd en það er ekki slíkt fjárhagslegt mat þannig að ég hvet hæstv. ráðherra til að skoða það og ég hvet líka hv. þingnefnd til að fara sérstaklega yfir þetta. En eins og segir í síðustu málsgrein 143. gr. að komi í ljós að ekki hafi farið fram mat á fjárhagslegum áhrifum samkvæmt þessari grein og ljóst sé að löggjöf, stjórnvaldsfyrirmæli eða stefnumarkandi ákvörðun ríkisins muni hafa fjárhagsleg áhrif á sveitarfélögin á ráðherra að eiga frumkvæði að viðeigandi ráðstöfunum. Nú erum við til að mynda með barnaverndina, við erum með farsældina og hér fyrir tveimur þingum síðan var mikið rætt um hækkun veiðigjalda. Á meðal raka þeirrar sem hér stendur var að það vantaði fjárhagslegt mat á sveitarfélögin. Hér lágu fyrir umsagnir frá nánast öllum sveitarfélögum á landinu sem höfðu áhyggjur af þessu. Hvernig sér hæstv. ráðherra fyrir sér að hann geti framfylgt þessari grein eins og hún liggur fyrir í þessu frumvarpi út frá þeim lögum sem hér hafa farið í gegn og eru að öllum líkindum að hafa töluverð áhrif á fjárhag sveitarfélaga?