sveitarstjórnarlög Virðulegur forseti. Ég þakka hv. þingmanni fyrir sitt seinna andsvar. Hafa verður í huga að niðurstaða áhrifamats um að lagasetning feli í sér ákveðinn aukinn kostnað fyrir sveitarfélög hefur ekki sjálfkrafa í för með sér að sveitarfélögum verði bættur sá kostnaður upp á krónu enda hafa sveitarfélögin sjálfstæða tekjustofna. Varðandi þetta með niðurskurðinn núna í fjárlögunum þá var um tímabundið framlag að ræða sem fellur niður. Varðandi það hvar mörkin eru, eins og með veiðigjaldið, er spurning hvort það eigi við í hvert einasta skipti. Ég myndi telja að þetta þyrfti að vera málefni sem snýr beinna að sveitarfélögum. Það er mín skoðun. En það er mjög erfitt að finna hvar mörkin eru. Öll lög og reglur geta haft áhrif á fjárhag sveitarfélaganna en það hljóta að vera einhver mörk á því hvar þetta mat eigi að vera og hvar ekki. Það verður reynslan að sýna varðandi framkvæmd laganna. En hér er klárlega verið að styrkja þetta og ráðherra ber klárlega ábyrgð á að grípa til ráðstafana ef ekkert mat hefur farið fram. En þá er spurningin og mat ráðherrans hvenær eigi að grípa til ráðstafana og hvenær ekki.