sveitarstjórnarlög Herra forseti. Nú veit ég að ég er að gera ráðherranum óleik því þetta er auðvitað ekki hans málaflokkur en ég bendi honum á það að í 2. gr. í samkomulaginu stendur nú að einnig geti fallið undir skilgreininguna börn sem þurfa mikla og viðvarandi þriðja stigs þjónustu á vegum barnaverndarkerfisins vegna vanrækslu og/eða ofbeldis. Það hefur ekkert með fötlun að gera. En mig langar í mínu seinna andsvari að heyra sérstaklega ofan í ráðherra því ég veit að ráðherrann er mjög áhugasamur um sameiningu sveitarfélaga og ég held að hann hafi nokkuð til síns máls þegar hann nefnir það að stærri sveitarfélögin séu öflugri heldur en þau minni og líklegri til að geta sinnt þeim flóknu og erfiðu verkefnum sem koma á borð sveitarfélaganna og eru jafnan á borðum sveitarfélaga. Mig langar til að heyra ofan í ráðherra með það hvort hann telji að þær breytingar sem verið er að gera núna á þessu frumvarpi og væntanlega munu koma til framkvæmda séu líklegar til þess að stuðla að frekari sameiningu og ef það er, hvaða væntingar ráðherrann hefur um sameiningar í þeim efnum. Sjáum við sveitarfélög hverfa sem t.d. telja fáeina tugi eða jafnvel fáein hundruð?