sveitarstjórnarlög Virðulegi forseti. Ég vil byrja á að þakka hæstv. ráðherra fyrir framsögu á sínu frumvarpi. Þetta er efnismikið frumvarp og góð framsaga hjá hæstv. ráðherra. Hæstv. ráðherra kallaði eftir því áðan eða sagði hér í ræðustól Alþingis að hann hefði nú ekki hitt þann þingmann sem væri honum ósammála þegar kæmi að íbúalágmarki eða sameiningu sveitarfélaga. Þá upplýsist hér með að ég er algjörlega ósammála ráðherra hvað þetta varðar og það á ekki að koma neinum á óvart. Ég velti því fyrir mér þegar það er fullyrt hér í ræðustól Alþingis að þetta sveitarfélag eða hitt sé veikt sveitarfélag. Það má vel vera að það geti ekki veitt sömu þjónustu, en er það baggi á samfélaginu? Nei. Það er nefnilega lykill málsins. Eru þessi sveitarfélög að þvælast fyrir öðrum? Það held ég ekki. Nú þekkjum við það ágætlega, þingmenn í Norðausturkjördæmi, að það eru fámenn sveitarfélög vítt og breitt um kjördæmið, Fljótsdalshreppur, Tjörneshreppur, Grýtubakkahreppur, Svalbarðsstrandarhreppur, svo talið sé svona áfram. Ég hef ekki orðið var við að þessi samfélög séu baggi á öðrum. Geta þau boðið upp á sömu þjónustu og önnur? Ef svo er ekki, þá kaupa þau hana af nágrannasveitarfélagi. Og er það baggi á því sveitarfélagi? Það þurfa aðrir að svara fyrir. Ég tel mjög mikilvægt í þessu samhengi, hæstv. og virðulegur forseti, að það verði gengið hér rólega um og borin virðing fyrir því hvað íbúar hinna dreifðu byggða og minni sveitarfélaga vilja gera í náinni framtíð, hvert þeir vilja stefna o.s.frv. Það er ekki okkar að ákveða það.