sveitarstjórnarlög Virðulegur forseti. Hefur Alþingi Íslendinga verið að gera eitthvað til að krefjast þess að sveitarfélög sameinist? Nei, það hefur ekki gert neitt til þess. Þetta hefur allt komið frá íbúunum sjálfum. Það er ekkert í þessu frumvarpi hér sem er að knýja sveitarfélög til að sameinast, ekki neitt. Það er ekkert um lágmarksfjölda íbúa sveitarfélaga. Það sem er hins vegar í barnaverndarlögum, og barnavernd er hjá sveitarfélögunum, er krafa um að barnaverndarsvæðin séu 6.000 íbúar. Ríkisvaldið kastaði raunverulega inn handklæðinu í lögum um málefni fatlaðs fólks. Ríkisvaldið er raunverulega farið að horfa á sveitarfélögin sem hóp sveitarfélaga, þau taka að sér málefni fatlaðs fólks, ekki einstök sveitarfélög, ekki sveitarfélög sem eru með 500 íbúa eða 600 íbúa. Það mun aldrei sjálft sjá um barnaverndarmálin. Það mun aldrei sjálft sjá um mörg verkefni sem þeim er falið sjálfum. Annað mikilvægt atriði sem ég kom inn á í ræðu minni er að við erum að kjósa sveitarstjórnarfulltrúa. Til hvers? Til að sjá um þau verkefni sem löggjafinn er búinn að fela þeim. Það er þess vegna sem við kjósum sveitarstjórnarfulltrúa. En það er þannig að sveitarstjórnirnar eru það veikar sumar að þær láta annað sveitarfélag sjá um þjónustuna. Það er ekki lýðræðislegt. Það er ekki heldur lýðræðislegt að setja þetta allt í byggðasamlag. Það er ekki lýðræðislegt. Til hvers erum við að kjósa 455 sveitarstjórnarfulltrúa í landinu ef ekki til að sjá um lögbundna skyldu sem er í lögum? Til þess erum við að þessu. Það er hlutverk sveitarstjórnarfulltrúanna, lýðræðislega kjörinna, að sjá um þau hlutverk, alveg eins og það er hlutverk okkar hér á Alþingi að setja samfélaginu lög og reglur. Þannig er þetta. Og að við séum eitthvað að krefja þau um sameiningar. Þetta hefur verið þannig enda sjáum við ástandið núna. Við erum með 150.000 manna sveitarfélag sem er Reykjavík, og alveg niður í 50 manns og allt þar á milli. Ríkisvaldið hefur ekki verið að taka á þessu, Alþingi hefur ekki verið að taka á þessu. Við munum sennilega búa við þetta áfram. Ég veit það ekki. Ekki nema það komi frá þingmannanefndinni sem ég vonast til að svari þessum spurningum sem við munum leggja fyrir hana. Forseti er auðvitað fullviss þess að bæði þingmenn og hæstv. ráðherrar séu meðvitaðir um að þegar fjórir óska eftir andsvari er ræðutíminn ein mínúta í fyrri og seinni umferð. Það var rúmt á því núna.