sveitarstjórnarlög Virðulegur forseti. Ég þakka hv. þingmanni fyrir ræðuna. Varðandi 129. gr. í núgildandi lögum og nú 143. gr. í frumvarpinu, um mat á fjárhagslegum áhrifum, þá tel ég ekki, og ég held að ekki hafi verið gert ráð fyrir því að ákvæðið, 143. gr. frumvarpsins, eigi við um fjárlög t.d. Ég get ekki séð að það eigi við. Það er fyrir utan mörk þessa ákvæðis, að áður en fjármálaráðherra mæli fyrir fjárlögum sínum hér í þessum sal þurfi hann að vera búinn að meta það, fara í matsferli gagnvart sveitarfélögunum, þegar hann er að uppfylla stjórnskipulega skyldu sína um að koma með fjárlög fyrir næsta ár. Ég get ekki séð að þá þurfi að fara fram fjárhagslegt mat. Það geta aðrir komið með önnur rök en þetta er mín sannfæring. Ég tel að þau verði að hafa bein áhrif á sveitarfélögin hvað þetta varðar. Og líka varðandi veiðigjaldið. Það var ekki talið að 129. gr. ætti við um veiðigjöld. Það voru hliðaráhrif. Ég held t.d. varðandi fjárhagslegt mat að þá snúist það ekki um að ríkið geri upp hvern útgjaldalið við sveitarfélög upp á krónu eins og verktaki, heldur séum við að meta kerfislæg áhrif á sjálfstæða tekjustofna þeirra og tryggja að nýjum skyldum fylgi raunhæfur innleiðingargrundvöllur. Það var t.d. gert þegar grunnskólar voru færðir yfir til sveitarfélaganna. Þá var útsvarið hækkað: 80% til sveitarfélaganna og 20% í jöfnunarsjóð o.s.frv. En um samskipti ríkis og sveitarfélaga varðandi verkefni sem hafa verið flutt til sveitarfélaga þá þarf að taka það upp á grundvelli samstarfsvettvangs milli ríkis og sveitarfélaga og í viðræðum í sambandi við það. Þetta eru bæði lýðræðislega kjörnir fulltrúar, þingmenn sem eru í ríkisstjórn í þingræðisríkinu, og líka lýðræðislega kjörnir sveitarstjórnarfulltrúar og það verður að bera virðingu fyrir því. Ég ber mikla virðingu fyrir því að færa verkefni til nærsamfélagsins. Þá hefur sú ábyrgð með kjörna fulltrúa að gera en þá er ekki hægt að senda það til næsta sveitarfélags eða inn í byggðasamlag þar sem stjórn fagmanna er kannski við völd. Það væri gott að heyra viðhorf hv. þingmanns hvað þetta varðar.