störf þingsins Frú forseti. Í gær naut ég þess í blíðskaparveðri að vera viðstaddur gangsetningu Vaðölduvers í boði — í boði hverra? Fjármálaráðherra. Landsvirkjunar. Það var nú Landsvirkjun, já. Það var hins vegar hæstv. fjármálaráðherra sem gangsetti. Við aðstæður sem þessar svellur manni móður í brjósti um það hvað það er raunverulega sem við getum gert, Íslendingar. Landsvirkjun var stofnuð 1965 og síðan höfum við virkjað fallvötnin, virkjað jarðhitann og virkjað vindinn nú síðast, allt til hagsbóta fyrir land og lýð. Við eigum líka frábært lífeyrissjóðakerfi sem gerir það að verkum að efnahagur almennings er ásættanlegur á efri árum. Frú forseti. Við eigum að vera stolt af því sem við gerum vel og vanda okkur í hvívetna við það sem við tökum okkur fyrir hendur. Landsvirkjun og hvernig hún hefur þróast er dæmi um það hvað við gerum vel. Landsvirkjun var stofnuð 1965 í því skyni að selja raforku til stóriðju. Stóriðjan er þannig sú atvinnugrein sem hefur hjálpað okkur við það að virkja þannig að við skulum ekki gleyma því að ef við hefðum ekki einhvern til að kaupa rafmagnið þá væri til lítils að virkja það.