staðfesting ríkisreiknings 2025 Virðulegi forseti. Ég þakka hæstv. ráðherra fyrir skýr og góð svör. Ég held að það sé mikilvægt að formaður og varaformaður Viðreisnar ræði þetta mál, þessa 43 milljarða, því að það kemur alltaf nýtt svar í hvert skipti sem maður spyr. Hæstv. utanríkisráðherra kannast ekkert við það hér í þinginu að halda aftur af þessum upplýsingum en sömuleiðis liggur náttúrlega fyrir að við fengum meira eins og í fyrstu tveimur útboðum Íslandsbanka. En látum það liggja á milli hluta. Ég ætla að spyrja að tvennu. Það er náttúrlega stór viðsnúningur þarna eða stórt uppgjör varðandi Lífeyrissjóð starfsmanna ríkisins. Við ræddum það mjög lítið í fjáraukalögum þegar þetta kom fram og ég spyr hæstv. ráðherra hvort það standi nokkuð á ráðuneytinu að veita tilheyrandi upplýsingar hvað það varðar. Síðan spyr ég líka að því, og þar er ég sammála hæstv. ráðherra sem talar mikið um að vanda til verka: Getum við ekki treyst því að þau fjáraukalög sem koma í framtíðinni fari eftir lögum um fjáraukann, það verði bara ófyrirséð útgjöld þar inni en önnur útgjöld verði ekki?