staðfesting ríkisreiknings 202 Virðulegi forseti. Ég þakka hæstv. ráðherra fyrir prýðilegt andsvar. Hann spyr um einn þáttinn þegar kemur að lögum um opinber fjármál. Nú skal það sagt að frá því að ég kom mest að þessu sem varaformaður fjárlaganefndar hef ég sinnt öðrum embættum. Það skal viðurkennast að ég var meira að hugsa um rekstur míns ráðuneytis eða minna ráðuneyta en nákvæmlega þennan þátt. Ég er því svolítið að taka þráðinn upp aftur og meðal annars að kanna þessa hluti sem hæstv. ráðherra er að spyrja um. Eins og ég skil það eru allir sammála um að þetta hafi verið mikil bragarbót. Þetta var mikil breyting til góðs. Einhverra hluta vegna erum við ekki búin að framfylgja öllu því sem þarna er og þá erum við núna að tala um framkvæmd fjárlagavalds. Hæstv. ráðherra vísar í innri endurskoðun en er sömuleiðis, ef ég skil málið rétt, með uppgjör innan ársins sem hefur alla vega ekki verið framkvæmt eins og ætti að gera og jafnvel fleiri þætti. Ég kann ekki svarið við því af hverju það hefur ekki verið gert en ég held að það skipti máli að við köllum eftir því. Ef niðurstaðan er sú að það séu málefnaleg rök fyrir því geri ég væntanlega ráð fyrir því, ég bara þekki það ekki, að þegar kemur að innri endurskoðun hljóti menn að huga að einhverju samspili við Ríkisendurskoðun. Það er það fyrsta sem mér dettur í hug en ég bara kann ekki svarið við því. Í mínum huga er það mjög einfalt að ég held að við ættum að fara yfir hverju breytt lög um opinber fjármál hafa skilað og fara þá sérstaklega yfir af hverju ekki hefur allt verið framkvæmt sem þar er inni. Menn vissu að þeir þyrftu að gera þetta í einhverjum áföngum. En það var 2015, ef ég man rétt, sem þetta var samþykkt, þetta eru tíu ár og við eigum núna að fara yfir það og meta hvort við eigum að taka eitthvað út úr lögunum eða bæta einhverju inn. Það er alla vega mitt mat að eftir áratug eigum við að fara yfir framkvæmdina og meta kosti hennar og galla.