staðfesting ríkisreiknings 2025 Virðulegi forseti. Við vorum ekki að biðja um fund. Við vorum að biðja um sundurgreiningu. Við erum búin að heyra að þetta sé í A-hlutanum og að þetta sé einhvers staðar annars staðar. Flott, þá viljum við fá sundurgreininguna. Það var ekki verið að biðja um fund. Ef hv. þingmenn í fjárlaganefnd færu ekki fram á sundurgreiningu á 43 milljörðum til varnartengdra verkefna þá væru viðkomandi hv. þingmenn fullkomlega meðvitundarlausir. En það var ekki verið að biðja um fund. Það er verið að biðja um sundurgreiningu á þessum 43 milljörðum. Við báðum um það fyrst í október fyrir ári síðan. Ég skil ekki alveg hver tilgangurinn er hjá hv. þingmanni með þessu andsvari. Ég verð að viðurkenna að ég skil ekki alveg hvað er í gangi. Hvert er vandamálið, virðulegi forseti? Hér koma menn upp og segja: Heyrðu, ekki hafa áhyggjur og það var sent bréf 19. maí og sagt að við mættum koma á fund. Virðulegi forseti. Já, flott, bara gaman að því, bara ekkert mál að koma á fund en við báðum um þessa sundurgreiningu. Það hafa enn ekki komið nein rök fyrir því af hverju menn eru ekki tilbúnir að koma með þessa sundurgreiningu. Hæstv. fjármálaráðherra segir: Ég er alveg til í það en það er hæstv. utanríkisráðherra sem vill ekki að þið fáið þetta. Hæstv. utanríkisráðherra segir í þinginu: Heyrðu, það er ekki ég. Þetta mál er bara að verða verulega dularfullt. Ef einhvern tímann er þörf á Sherlock Holmes þá er það núna, virðulegi forseti, því það er ekki nokkur leið að finna út hvað er í gangi hérna.