ársreikningar Herra forseti. Ég þakka hv. þingmanni fyrir fyrirspurnina. Það er eins og mig minni að við höfum átt þetta samtal hér fyrir hálfu ári þegar málið var síðast á dagskrá. Ástæðan er fyrst og fremst þessi séríslenska lausn sem íslensk örfélög hafa með hnappinum svokallaða, þar sem þau fá svigrúm til þess að skila ársreikningi inn með því að nota skattinn, eins og ég fór yfir í ræðu minni áðan. Ef við hefðum hækkað mörkin þannig að það fjölgaði þessum fyrirtækjum innan örfélagarammans væri ástæða til eða þörf á því að endurskoða þau fyrirtæki sem fá að nýta sér þennan hnapp því hann var upphaflega hugsaður fyrir fyrirtæki með mjög einfaldan rekstur. Það var meira horft á einfaldleika rekstrarins eða eðli rekstrarins í þeim skilningi frekar en akkúrat krónutölur og annað slíkt. Það er alls ekkert útilokað að gera það. Það er hins vegar bara aukaskref sem þyrfti þá að taka samhliða. Mat mitt er það að hnappurinn og notkun á honum skipti örfyrirtæki það miklu máli að það sé eðlilegra að halda honum inni, bjóða upp á þá séríslensku lausn ef svo má segja, frekar en að fara alla leið upp með mörkin. Það er auðvitað meira en eðlilegt og sennilega nauðsynlegt að þessu sé varpað upp í vinnu nefndarinnar en fari það upp þá þarf að endurskoða aðeins mörkin sem hnappurinn nær til.