ársreikningar Virðulegi forseti. Ég þakka hæstv. ráðherra fyrir svarið. Af því að ég er hér að enduróma umkvartanir og athugasemdir frá atvinnulífinu, og ég heyrði að hæstv. ráðherra vísaði til þess að við ættum auðvitað eftir að fara í gegnum þinglega meðferð og svo kom hingað upp formaður hv. nefndar og tók vel í það, þá finnst mér mikilvægt — af greinargerð þessa máls má lesa að hér sé um innleiðingarmál að ræða og það er vísað þar í þrjár tilskipanir: ársreikningatilskipunina og síðan tvær tengdar tilskipanir. Við höfum sett okkur hér reglur um þinglega meðferð EES-mála og það er gríðarlega mikilvægt þegar verið er að bregða svona út af, og hæstv. ráðherra vísar til séríslenskra aðstæðna eða reglna eða framkvæmdar, að við gerum skýran greinarmun á því og mér finnst ekki nógu vel að gert þó að ég hafi skilið málflutning hæstv. ráðherra hér og síðan orðaskipti sem fara fram í kjölfarið. Það verður þá að tiltaka af hverju við erum að ganga lengra, velta upp þessum möguleikum, að mínu mati, ef við ætlum ekki að fara í bága við þessar reglur um meðferð EES-mála hér í þinginu. Þá er hreinlega hægt að taka efnislega afstöðu til þess hvort verður ofan á, ef það er verið að bera saman tvo kosti, a.m.k. að þeim sem fara í gegnum málið sé ljóst að hér er ekki beinlínis um skyldu að ræða samkvæmt þeim ESB-tilskipunum sem vísað er í. Mig langar því til að hvetja hæstv. ráðherra til dáða í þeim efnum og sömuleiðis, af því að ég heyrði að hún var jákvæð í garð þinglegrar meðferðar nefndarinnar eins og á að vera, til að taka vel í umleitanir og beiðni nefndarinnar um aðstoð ef það stendur til að létta málið enn frekar, sem ég tel að það sé full þörf á og mun fara yfir í stuttri ræðu á eftir.