varnir gegn snjóflóðum og skriðuföllum o.fl. Virðulegi forseti. Ég vil þakka hv. þingmanni fyrir mjög málefnalegt innlegg og þetta er auðvitað eitthvað sem við verðum að huga að til framtíðar. Ég veit að þegar frumvarp sem var að mörgu leyti sambærilegt því sem nú er lagt fram kom fram árið 2020 var þetta mjög dóminerandi í umfjöllun nefndarinnar. Ef við skoðum bara lögskýringargögnin frá því að lögin um ofanflóðavarnir voru sett á sínum tíma þá kemur þar mjög skýrt fram að tilgangur laganna sé að verja mannslíf og koma í veg fyrir slys á fólki. Þar er tekin sú afstaða að forgangsraða sérstaklega vörnum fyrir íbúðarhús fram yfir atvinnuhúsnæði af þeirri ástæðu að fólk dvelur mest heima hjá sér, mestan hluta sólarhringsins. Þetta var megintilgangurinn með setningu laganna, að allir gætu sofið rólegir heima hjá sér óháð búsetu og um leið að mennta- og heilbrigðisstofnunum væri veitt ákveðin forgangsröðun. Eins og ég hugsa þetta þá skiptir miklu máli og er mikilvægt til framtíðar að verja atvinnuhúsnæði að einhverju marki líka. Ég tel hins vegar heillavænlegt að forgangsraða áfram með þessum hætti og hnykkja þannig á eða auka skýrleika markmiðsákvæðis laganna til samræmis við það sem lagt var upp með í upphafi og jafnframt þá forgangsraða í raun þeim ofanflóðaframkvæmdum sem enn eiga eftir að eiga sér stað sem eru til þess fallnar að verja íbúðarhús og svo að huga að hinu. Það er ekki endalaus framkvæmdageta og það gildir um þetta eins og allt annað að forgangsraða fjármagni og framkvæmdum. Ég tel að þetta hafi verið skynsamleg forgangsröðun á þessum tíma og eigi að vera þannig áfram en fagna að öðru leyti umræðu um þetta mál. Þetta er auðvitað spurning sem er sjálfsagt að velta upp. Til framtíðar er full ástæða til að huga að mögulegum lagabreytingum sem miða að þessu líka.